الحلم
بوقـت مـن البطا،وبلـيـل تتـرقـص شياطيـنـه
بعد شفت الضيـا ينـزع مـن ثيـاب المسـا ثلثيـن
تحايلـت المنـام الـلـي مـثـل بيـتـك تمريـنـه
وانا اللي من تفارقنـا وأنـا ماغمضـت لـي عيـن
غريبة!!كـل حـلـم يـمـر بـرقـادي تزوريـنـه
والاغرب..كيف أحلم الحلم،وارجع واحلمـه بعديـن؟
قبـل يومين،شفتـك بالمنام..وقمـت مـن حيـنـه!
ونمت أمس،ورجع نفس المنـام اللـي قبـل يوميـن
أنا اللي قبـل اسافـر شلـت قلبـي مـن شرايينـه
تركتـه فــي يــدك الأمانه،واحفظيـهـا زيــن
تـرى حفـظ الأمـانـه دين..مجـبـورة ترديـنـه
أجل ، مافيه أحد قال لك((حفـظ الأمانـة ديـن))؟!
مــرد المقـفـي بيلفي..ويستـوفـي ،وتوفيـنـه
بعدليله،ثلاثه،أربعـه،عـشـره،شـهـر،شـهـريـن
إذا انتـي ،ماانتـي بقـد الكـلام الـلـي تقوليـنـه
حرام...استامنك حاجـة،وإذا جيـت اطلبـك تنسيـن
تخونين،وتبيـن أرضى!..واحـد يرضـى تخونينـه!
أنا لاجيـت أخونك،مـع حبيبـة ثانيه،((ترضيـن))!
من أول مارجعت من السفـر ماشفـت لـك بينـه؟
وأنا اللي كنت أحسبك قبل ادوس ارض المطار..تجين
تكونين أنتـي أول شخـص عينـي تحتضـن عينـه
وكنـت أتخيلـك مـن زود فرحـة رجعتي..تبكيـن
وأشـوف بدمعتـك حكيك..وأعرفـه قبـل تحكينـه
واجيب أحلى مـن اللـي بتحكينه،وأتركـك تحكيـن
تقوليـن:الـوطـن نور..وأقول:بنورمـضـويـنـه
تقولـي لي:غديـت أحلى،وأقول:عيونـك الحلويـن
كــلام نــام بشفاهك..وخفـتـي لاتصحـيـنـه
ذخرتيـه لغـرام للـي ينام...ويـتـرك تصحـيـن
تغانمـتـي غيابي..لـيـن رجحـتـي مـوازيـنـه
تعلم مـن يـدك لمـس الكفـوف وعلمـك تجفيـن
وليتـك لاقـيـه بــه شي...فيـنـي ماتلاقيـنـه!
مهـو بغرور..لكـن خابـرك مالـك أمـل تلقـيـن
تغافلـك بغـلا..والإ الحـلا مهـو بمـن زيـنـه!!
تزينه الصور ..بس الصحيح ابن الحلال((زويـن))!!
وأنـا مانـي بنقـاص عنـه يـوم أنــك تبديـنـه
نصيبي..هو نصيبـي لـو يسددهـا مـن الصوبيـن
قـنـوع بمظهري،والـسـم مـايـذبـح ثعابـيـنـه
على قول المثل((ماني حلو..لكنـي مانـي شيـن))!
إذا أهـداك الزهـر مره،فأنـا اهديـتـك بساتيـنـه
وإذا ألهاك بفرح ليلـه، فانـا تهـت لبكـاك سنيـن
وإذا استضعفـتـك أملاكه...وشتـتـك ملايـيـنـه
أنـا حتـى فتـات الخبـزة أقسمهـا معـك نصيـن
طموحـي ،بـس أجـي وأظفـر بشـي تستحقينـه
تدينته،تسلفته،سرقـتـه،مـومـهـم مــنــيــن؟
كأنـي مـن كثـر ماارضـى بكـل اللـي تمنيـنـه
لـو انـك تطلبيـن الله ..يعنينـي، بـقـول آمـيـن
أنا ماالعـب علـى الحبلين،وقـت الطيـش وسنينـه
تبين الحين يوم أني كبرت العـب علـى الحبليـن؟!
ترى عند البـدو بالذات((عيـب اللـي تسوينـه))!!
حـلاتـك لاعشقتي..تعشقيـنـي لـيـوم الـديــن
غـرامٍ نسكـن ضلوعه...حشيمـه مـن مجانيـنـه
جفا،يجـمـع معزتنا...ولاعـشـق يــذل أثنـيـن
كـثـار الـلـي تحـدونـي وقالـولـي :تحبيـنـه
امانه..لاتخلينـي صغيـر بعينـهـم ((تكفـيـن))!!
لانــي كــل ماقالوا((تخون))..اقول:مسكـيـنـه
علـيـك الله وأمانه..علميـهـم منـهـو المسكـيـن
أنـا خايف((لياطـاح الجمـل تكـثـر سكاكيـنـه))
وأنـا ماعـاد بضلوعـي مكـان لطعنـة السكـيـن
مــثــل مـاقــالــواالمكتوب واضح من عناوينه
لو ارحل منك للغربه..بسافر مـن ظلامـك ويـن؟!
كفايه..كـل حـلـم يـمـر بـرقـادي تزوريـنـه
كفاية...مـن تفارقنا..وأنـا ماغمضـت لـي عيـن
قبـل يوميـن شفتـك بالمنـام وقمـت مـن حينـه
ونمت أمس،ورجع نفس المنـام اللـي قبـل يوميـن
وســـــــــــــــــــــلامتكم
الرئيسية 
الأربعاء مايو 21, 2008 9:37 pm
